Dhara-Phara

Dimasa Samaj ni Dhara-Phara ni Yader

Sri  Lonkeswar Nunisa

General Secretary ,Jadikhe Naisho Hosom

      Dimasa samaj ni dara-phara bedehe slamba, sumu yader khe remdada slamba bu buthukhe rebma thikala phinsi phingni laisiha jaoya. Sum bedehe thikade dhara-phara la hamsining bangbi. Hajaiba-thoraiba ni phrang thiba-baiba, maimutharba soshini dara thisophuya. Madai haithini dara se aar bangdaokho. Bishu marmi jibani bo olaining dara bangbi. Odebani khrib dara-phara ni yader khe rebyahi, masi magni dara khe sumjabani nangba bokhe rebdu. Dini dakhna ni jalai rao dekhu sgangrao mithidaomane.

Subung hasaoha nana jahi hajaikha thikaning hotmai jagaohi hah tharbani lugu-lugu daosa thaima nangdu,hojaijik barowajik ne bising yaophahi nanani buma-bupha paap golama nangdu. Sumo jabani thikhade gadaha Sengya Halodao bo daosa thaiya sanining jabah thangma nang hi thangdada phaiphin phuya hi thaolaba. Odebani daosa thaiba thiyaba subungne phantha nangdao thaoyaba dara jahi thaokha.

Olaining habsao hajai hi subung dambra ha hangai yaba jimu-gaingmu khe madairao ne rima nangre ne. Olai jimu-gainmu ribakhe phara khoba thire. Phara thiba ha jaadi bangbi,shoni-dosa,groho-dosa,ori-dosa,shankar-dosa,phara masniba-majabra aar gibin gibin thihi dongre. Bo buthu khe bilaiyaba phara, sumu badainha dain daokhu baha na daokhlai baha nangma? Bokhe sma naihi saikhuhi phara khoma nangre. Odehe niya thikhade gaso-suso, dibin-sibin , ghotna-bipot gede gede jaare thihi samaj ha dara dong.

Jukhu baha habo olaining dara bangbi. Sandi dangshingba ni phrang, phira thangba sosi. Grao khening thiha nang , saosi gini subung baola phure sumuni Sandi nangma, laothai nangma, sumuni khrong khama nangma? Thikabo ode niya. Dara khede manima nangning nangba se , saojang gini jang ruphuya.Dara ning Dimasa samaj ni discipline. Phadain hagong yaoma thikala, jar baraha yaoma oraha daopher pherhi dengma nangdadu. Daopher pheryaba subungse oraha phadain dangmaima. Mlai gibin subung dangphuya. Odelaining Chandi dangshingkha thikhase masaingjik saoshikhe miya saoshi jukhuma thihi bubra japhuba. Chandi ajaohi phinphinre thikade masaingjik yababo dai dosa (fine) rima nangre.

Disingba ha khrong khaba nibo olaining graothai dong. Gda ha Raja maasi niha Raja masi haing khama thihi tokhidada jukhuma basain khali hala jbase dainlaima khane. Bu niphrang dara masi thaobukha, haing khama thikabo lonya kha odebani khrong khahi sibaya rao jonhi dongba. Asaba subong bo phaire thikade bokhe habriya. Haingkhama gini ning thikade maya jang jugrik rikhase lonsima ode niya thikhade thikhade lonyakha ; thikabo gibi jang ning jugrik rihi hainthi khamane se phaiba thihi beedu thikala bo khrong khe masaingjik gede ni dolning rukhla lama. Ebo dara jukhu baha masi nangdao thao yaba dara.

Jukhu jaohi miya ni gede phera thanghi phin pherasa thisi msaingjik ni gede thangphinbahabo olaining dara dong. Koina Daman jang mamang thangthao ya. Asaba gibin subungkhe langphama nangdu. Sum jaba ni thikala gda ha jukhu jaoba gdainha koina-daman ginijang khlaihi haagong gg lubaha masi ghotna jaba thidu. Koina khe saojang denghi Daman baiji khushi thangda haba haning hasongse daman jasosi jahi phaidada bo koina khe langla khane. Yahon ha daman asol phaibala grao banglaikha, gni jang ning saogari baosi bani koina la jarni asol daman khe mithi phrangphuya kha. Yahon ha salisha bisar  khamba hase saosi bisar-blaiyaba buddi gnang thiba thidu , sere asol daman buse ebo masaingjik  khe maima  aar asol daman thikha de ebo botol basa ha hab phuma nangma; olai habphuya thikhade bo subung daingjaoma - thibane.  Hasong la bo grao khe khana hi bo koina khe maima ni lub jang tamphima jahi botol bising ha habkhane ; lugu-lugu bo botol khe phrojeb hi bo hasao khe waiha saokhribkha. Odejang se Daman asol koina khe maihi thaoba thidu. Buni yahon hase pherasa thangba ha mlaikhe langphama nangdu thihi dara thaoba. Dini dakhna habo ebo dara khe lonya thikhade, maniya thiakade hasong ni kharmin lai jaya thikabo, doda-khuda, bipot-apot  goron la phure.

 Elaining bishu marmi jibahabo banjik basa Naga-Hoja jathaoya thihi dara dong, hangsong manaohi bishu jikhaobaha gjaibaoni derga khe khaokhlai habani dara dong. Aar gibin gibin dara bangbi kho. Bo buthu yader ganang gaja se.

Madai haithini dara-phara habo Sibarai raodao thao jahi halam dowal maiya thikhabo khriphabo khampha phudu. Bo dara nibo olaining phairen(ortho) dong.

Elai laining thibani baibani, daoma-daosa daobani , maimu-tharba ni , maidikho gabani , Chongi khobani, mangkholung saobani dara bo yader ganang gaja se. Odebani saojang gnuijang jaba-jaya mithiya hi dara-phara khe ruma dabaobai.

"Stand up, be bold be strong. Take the whole responsibility on your shoulders and know that you are the creator of your own destiny. All the strength and succor you want is within yourself. Therefore make your own future." - Swami Vivekananda.