Kalachand ni Jarimin (History)

Kalachand ni Jarimin

- Phaijendra Karigapsa

Kalachand , Dima Hasao

Kalachand masi hasao rajini bumu ganang hathani. Ebo Maibangmah Rajathani Sub-division ni masi Mouja gedeba dongba. Dimasa jomsi jang gabang dong-yabah thani, majangsisi Mahur dibu dergong baigni sersing giding nohlai gejer ha hadi gowar.

Kalachand ni majangmah hadi hawar jang

Sersing giding haju harang

Bongraling ja gablaidu,

Nuhabase gakhrang gili

Wasiling lang gablaidu.

Ashari badaing phaibunang

Dijang gblai hadi hawar,

Nuhabase Dimalang warilai

Ali khotai diha gaolem bainang

phojlop phojlop

Nalamaha ancharao langtha

dugurnang phongslo phongslo.

Hadi gejer mai hosa khainang phli phli

Aadung ajang phurikho ha

Phainang beren beren,

Nalamahkhe disurnang siri siri

Naga malah musa kaolai  miri miri

Maising mailao phaibunang

Mahur dibu raingbunang

Naga malah beren beren longthai

khroh ha rif sunang

Malah majang saogur majang

dergong jnaphlanang

Barbai sobasi midimphlungba

sabon bahai jang.

Mahur dergong warbasi phulili

adongsa ni rhijamphain,

Mahur dibu khamkhaning

Habsao ni dukhu blaodu

Hadi gejer songkhaning

Jalangmah sain gejer hukhrima blaodu.

 Elai majangthani bedehe Kalachand thihi bumu maiba? Manang ha Kalachand hadi hawar jamani sgang ha bangla wari basaoni longrao sao ha masi raji dongba. Bo rajiha saosi bumu ganang khrao dongba , bo subung bo bublini hisab jang ganang desabi malai jang bo milibi. Boni bumu Kalachand thihi khrib bo mithire. Asol bumu Kalachand Dibragedesa Banglaima juluni basa. Boniha rja rja miseb dongba. Bo miseb khrangma ni hathani hamjaobani khlaihi eraha raji khahi dongba. Hading khro ha raji khabani bo rajini bumu Hading nohlai thihi malai mithire.

Malaini jadi Sri Krishna madaikhe Kalachand thi mithire. Madai Krishna mushu raokhiba jahi hathani khe naisore, mushu yerdaore. Thik olaining Kalachand Dibragede miseb raokhiba jahi jini Kalachand hadi khe jing Dimasa ne galangba. Thikala bo Kalachand Dibragede khe soyong Krishna baokhabo gajai janang niya. Boning ebo hadi khe yaosisengriba. Bardingfa ni basa Kalachand ni miseb khe raokhi hi dongba Kalachand giribani yahon ha boni miseb gamagumu jatharba , malai bubra jatharlaba. Thaidon Hagjer bo Kalachand ni miseb khe maipha kha kho.

Kalachand hadini baan 1902 maithaiha khajenba. Dorposing Hojai mujari jahi dongba ha bokhe malai Linglang Mujari thihi mithire. Bo mujari ebo nala khebo khusoriba. Bo bubli ha Girish Saab SDO jahi dongba. Bo bo juruphaba. Bo bubli ha Dorposing ni bumu jang Dorposingpur thihi dongba. Duha Sulikantapur thihi mithidu. Yahon ha 1956 maithai ha Kalachand nala ha hamsisi di phairiphuba.

Kalachand mouja ha khrib jang nohlai 30(thimji) jadu, boha Motibra Gajam nohlai radaothao, bo nohlai khe Dima Raja phaiba ha kharilangba ne. Dima Raja daophabu baha dusmon phaibai khala gaso mani Motibra ni suru suru Khejurbond jang Disagrain 1924 maithai ha raji khaba. Ragho nolaih raji khe Dibragedesa rao naijen phaiba , sgangni Kalachand bo Dibragedesa odebani Ragho nohlai ni bumu Notun Kalachand jahi thaoba.

Kalachand constituency ha total population 10000 basao jadu ode 3700 voter jadu. Kalachand ha sakri danghi dongyarao 5% sening, 95% hadam danghi, yawai thanghi jarni nokhorkhe mathangdu. Odebani jarni basa bisik khe hamba school ha pori rilai phuya thaoladu.Subung buthu ni hamba baothai dongkhabo khusi ha phanang phuya. Mel khamba ha grao reblai ba oraning thaolaba. Kalachand ha ringyarao, gnangrao girikhabo nangbaha malaikhe juru laiba hambi. Kalachand ni subung rao jadini somaj, dara-disa khe  nangjaoyarao se odebani duha sosi Dima dara Kalachand ha dong kho.Malaini ha naibai ma nangya kho.

Kalachand haphaiha 30(mathimji) L.P. School, 4(mabri) ME School, High School 2 (magin) jadu. Post Office 2(magin) Mupa, Khejurbond. Bajar masi, dispensary magin jadu, ode DIET office masi. Railway station magin jabamu Mupa jang Kalachand. Thikabo duha Line Dedaoyaba (BG) phaibani Kalachand station khe sugukha. Polling station duha sosi 5(mabowa) jahi dong. Ebo buthuni lugu ha Irrigation, seed farm, sericulture Department dongphadu. Dagalai 2010 maithai ni January badain sosini dataha maiba, masi magin rebma blaohi thaola phure eraha bislai rebkha bokhe malaini ha singhi rikhihise rebba. Khrib maithai aar subung ni bumu jasoyalaphure. Ebo ha juruyaba Sri Rosendra Nunisa, Khejurbond ni.

(Extracted from the Book Khurangshi Rmaolai )